ဇူလိုင် ၁၇ ၊ ၂၀၂၅
GG (VOM)
မိုးကုတ် – မန္တလေးလမ်းပိုင်းက ကားကူးပေးတဲ့ စဥ့်ကူးမြို့နယ်ထဲက ဆိပ်ကမ်းတွေ ပိတ်လိုက်တာကြောင့် ကားတွေကမ်းကူးနိုင်ခြင်းမရှိတော့တဲ့အတွက် ဒီနေ့ကစပြီး မိုးကုတ် – မန္တလေးလမ်းသွားလာလို့မရတော့ဘဲ ကားတွေပြန်လှည့်ခဲ့ရတယ် လို့သိရပါတယ်။
ဒီနေ့ ဇူလိုင် ၁၇ ရက်နေ့၊ နေ့လယ်ပိုင်းကစပြီး ကားတွေကမ်းကူးပေးနေတဲ့ စဥ့်ကူးမြို့နယ်ထဲက ထုံးကြီး ဇက်ကူးတို့ဆိပ်ပိတ်လိုက်တဲ့အတွက် မိုးကုတ် – မန္တလေးခရီးစဥ်သွားလို့မရတော့တာဖြစ်ကြောင်းနဲ့ မန္တလေးကိုသွားဖို့ မြစ်ဆိပ်ရောက်နေတဲ့ကားတချို့ကိုတော့ မြစ်ဆိပ်မပိတ်ခင် ကမ်းကူးပေးခဲ့တယ်လို့ သိရပါတယ်။
” ပိတ်တာကတော့ အထက်ကိုဆန်တက်လာတဲ့ မင်းကွန်းထိ ရောက်လာပြီဖြစ်တဲ့ စစ်တပ် သင်္ဘောတွေကြောင့် လို့ကြားသိထားပါတယ်ဗျ။ ထုံးကြီးဇက်ဆိပ်ပိတ်လိုက်ပေမယ့် အချိန်မှီ ကမ်းကူးပေးတဲ့ အခိုက်တန့် နဲ့ကြုံလို့ အစီး၂၀ နီးပါးနဲ့ အတူ မန္တလေးကိုရောက်ခဲ့ပြီဗျ။” လို့ ကမ်းကူးလာသူကပြောပါတယ်။
ဒီနေ့မှာ ဧရာဝတီမြစ်ကြောင်းတလျှောက် စစ်သေင်္ဘာတွေ တက်လာတယ်ဆိုတဲ့ သတင်းကြောင့်မြစ်ဆိပ်ပိတ်လိုက် သလို နယ်မြေအခြေအနေအရ နစကတပ်ဖွဲ့နဲ့ PDF တွေအကြား တိုက်ပွဲ ဖြစ်လာမှာစိုးရိမ်တဲ့အတွက် ထုံးကြီးရွာ ဒေသခံတွေလည်း ကြိုတင်ပြီး စစ်ဘေးတိမ်းရှောင်မှုတွေပြုလုပ်နေကြတယ်လို့သိရပါတယ်။
လက်ရှိမှာတော့ ထုံးကြီး ဇက်ဆိပ်ပိတ်လိုက်ပြီး သွားလာမရကြောင်းကို ကျည်တောက်ပေါက်ရွာကနေ သတိပေးတာအထိရှိတယ်လို့သိရပါတယ်။ တခြားကူးလို့ရတဲ့ ရေလယ်မော်ကလည်း အလားတူ ပိတ်ထားရတယ်လို့ သိရပါတယ်။
“မန္တ လေးသွားမယ်ဆိုရင် သွားမရဘူးဆိုပြီး ကျောက်ဖြူမှာ သတိပေးပါတယ် ။ ကျည်တောက်ပေါက်ကလည်းထပ်သတိပေးပါတယ် ။ရွှေပြည်ရောက်ရင်ပြန်လှည့်ခိုင်းပါတယ်။” လို့ ကားသမား တယောက်ကပြောပါတယ်။
မိုးကုတ် – မန္တလေးလမ်းပိုင်းက ရေလမ်းကြောင်းအသုံးပြုမရတာကြောင့် လတ်တလောမှာ မိုးကုတ် – မန္တလေးခရီးစဥ်တွေ ယာယီရပ်သွားပြီး ကားသမားတချို့ကတော့ ပြင်ဦးလွင် ဘက်ကနေသွားလာဖို့ စီစဥ်နေကြပါတယ်။
နစက ကတော့ မန္တလေးတိုင်းထဲက PDF စိုးမိုးနယ်မြေတွေကို ပြန်လည်ရရှိရေးအတွက် ရေကြောင်းအသုံးပြုပြီး တပ်သားအင်အား ဖြည့်တင်းခြင်း ၊ရိက္ခါနဲ့ လက်နက်တွေ ဖြည့်ခြင်း ပြုလုပ်နေတယ်လို့သိရပါတယ်။
လက်ရှိမှာ သပိတ်ကျင်းမြို့နယ်ထဲက ၄ မိုင်၊ ၅ မိုင်နဲ့ ၆ မိုင်ရွာတွေမှာ နစကတပ်နဲ့ ဒေသတွင်း လက်နက်ကိုင် တပ်တွေကြား တိုက်ပွဲ ပြင်းထန်နေတယ်လို့ သိရပါတယ်။
ဓာတ်ပုံ – CJ
